我要做丁蟹

時值大時代重播，考完最後一科 EU Law，我真係好想好似丁蟹掟佢四個仔落街咁樣，將Contract, Tort, Public Law 同 EU Law 呢四科啲 Textbook, Casebook 連埋啲 Notes 一次過由 IFC 頂樓掉晒落街。

唔覺唔覺，原來 CPE 派既 Notes ，加埋其他「棘瀝框勒」野，全部叠起黎有我半個人咁高（咁我生得矮係事實），我拖住佢地去到 IFC 準備上去天台，點知有個「食Ｑ」問我做乜。

我老實答佢，「無呀，呢啲野唔要架喇，準備拎去摺飛機。」
佢隻眼瞄一瞄，然後話，「咁多 Notes 第時你出黎 “pat tits” 都要用，留。番。佢。」

佢肯定既語氣，學汪亞姐話齋，真係令我個心離一離。OK，Fine。唔理佢，我繼續等車立，不過亦暗忖，嘩做乜呢位望落都幾有台型既保安員，對律師呢行仲熟過我。

「食Ｑ」先生見我無動於衷，一個華麗閃身，擋左係我面前。咁 objectively，佢身體語言係話我知，「有我係度，你今日唔使旨意扮丁蟹。」

「咩事，呢？」我明知故問。
「依家你隨時可以離開，我無 FI 你；我好似一幅牆咁企係度，亦無 Battery 你。你明我講咩嗎？」
「明明明，你講今年 Tort 教過啲野丫嘛，我未至於無記性到好似 Finding Nemo 入面條 Dory 咁。」

不過，唔講又講，講開又講，其實金魚記性唔差的，好多人誤會晒。

入番正題。

「點解既？點解你識呢啲既，唔通你係我師兄，但讀完 CPE … 咁件事好似有少少糟糕喎。」

一般黎講，情節去到呢度，就會「啊，我嚇到扎醒，成身汗，原來日有所思，夜有所夢，嗟。可能考完試太累，唔知點樣訓著左，然後唔知點樣就發左個怪夢。」

讀者諸君，請放心，事實「笨」唔係咁簡單，但容我暫且按下不表，而將時間撥番去九個月前，即係 2014 年 9 月，我正式開始讀 law 個日。